Ава чон                                            

Ава чон пуйто ончылгочак шижын –

Пытартыш корныш кайшыла кÿлтка.             

Шинчашке шинчавÿд молан тич темын?

Тÿрват чытырналтеш, ок лек йÿкат.

 

…Тÿня пÿртÿс моторлыкшым йомдарыш,

Эр кече куаналын ыш ончал.

Жап кенета шке вашкымыжым чарныш,

Вет ойго тольо, кунам тый шыч вучал.

 

Шÿм-чон падырашын ÿмыржö  кÿрлалтын:

Пеш самырык, калтак – но мом ыштет…

Лач пÿрымаш тыге улмаш пÿралтын:

Уке, ок пöртыл ынде икшывет.

 

Изиж годсек ончен-куштен толашыш,

Мыняре омо кодын? Лач ава пала.

Чын илыш-корныш шогалаш вет полшыш,

Но трук шем вий тыге солен пышта.

 

Ава чон вургыжеш: «Молан гын, эргым,

Тый кайышыч тышеч, чыла коден?!

Пуэм мый ыле олмешет шке ÿмыремым,

Лач иле ыле тыйже, куанен!..»

 

Тыге вет калыкмутшо лекте чыныш:

«Изи йоча да ойгыжат изи.

Кушкын шумек, шогале илыш корныш…

Кугу лиймеке, ойгыжат кугу».