Главная
Наш край
Культура
Общество
Истории жизни
Музыка
Молодежь
Новости
Ссылки
Эрзя - Мокша
Коми
Марийцы
Удмурты
Культура
Сказки
Поэзия
Праздничные напевы
Родина
Поиск
Зеч Ивор
Истории жизни
Малпанъёс
Вепсы
English
 

Утчан (Поиск)

***
Кыдёкын-а Тон, туж матын-а Тон,

Тонэ весь утча сюлэмы мынам.

Тон мынам Эше, Кузё-Инмаре,

Тон бордын гинэ сюлэмы буйга!

 

Мынам улонам пӧртэм сюресъёс,

Сюресъёс вылын пӧртэм быръёнъёс.

Кин бен валэктоз, кин визьнод сётоз,

Бырйыны кудзэ сюрес возьматоз?

 

Инмаре мынам, Со Валэктӥсе,

Инмаре мынам, сюрес Усьтӥсе,

Лулме небӟытоз, йырсазьме усьтоз,

Котьку но шонер сюрес возьматоз!

 

Кыдёкын-а Тон, туж матын-а Тон,

Тонэ весь утча мынам сюлэмы.

Тон мынам Эше, Тон- муспотонэ,

Тон шоры гинэ весяк мед учком!

 

 

***

Кӧня меда ми утчамы Сое,

Сое, Сое, Яратонэз!

Кӧня меда ми палэнтӥм Сое,

Сое, Сое, Яратонэз!

  Яратон! Яратон!

 Со милемыз возе на!

 Яратон! Яратон!

Со милемыз возьма на!

 

Кӧня меда сылӥз Со ӧс сьӧрын,

Нош ми Солы ӧм усьтэлэ.

Кӧня меда Со йыгаськиз отын:

«Я, усьты, усьты, сюлэмдэ, эше!»

 

Со Яратон лыктӥз дунне вылэ,

Асьме кадь луыса, улӥз.

Со Яратон мынӥз кирос вылэ,

Сьӧлыкъёсмы понна кулӥз.

 

Со Яратонлэн вань одӥг Нимыз:

Кузё-Инмар Иисус Христос.

Та дуннелэн огпол вуоз пумыз,

Нош ноку но уз быры Яратон!

 

   ***

Возь вылэ, тэле ке потӥсько,

Шур дуре ӵукна ке васькисько,

Нюлэсъёс шоры ке учкисько,

Инмарлэсь кизэ мон адӟисько!

 

Матысе шоры ке учкисько,

Удмурт тусбуез ке адӟисько,

Пальпотыса шораз вазисько,

Инмарлэсь кизэ мон адӟисько!

 

Удмурт крезьгурез ке кылӥсько,
Лулпушме солы ке усьтӥсько,

Кырӟаса-вераса лэзисько,

Инмарлэсь кизэ мон адӟисько!

 

Яратон кылъёс ке кылӥсько,

Сюлэмам шуныт ке шӧдӥсько,

Шумпотон мылкыдэн тырмисько,

Инмарлэсь кизэ мон адӟисько!

 

Яратон кылъёс ке верасько,

Кинлэсь ке сюлэмзэ шунтӥсько,

Шумпотон мылкыдме кузьмасько,

Инмарлэсь кизэ мон адӟисько!

 

Инмарлэсь кизэ мон адӟисько!

Сюлэмме Солы ке усьтӥсько,

Котькытысь Сое мон адӟисько,

Инмарез гинэ ке данъясько!

 

***

Пурысь инбамысь мон ыштӥ шундыез,

Ӧвӧл ни сюлмам табере югытэз.

Ветлӥ дуннетӥ, шундыме утчаса,

Бертӥ нош дорам, лулыным бӧрдыса.

   Я, кытчы, я, кытчы, ышид шундые,

   Я, малы, я, малы, кельтӥд тон монэ?

   Одӥг шаерысь но ӧй шедьты тонэ,

  Тонэ, Яратонэ но Муспотонэ!

 

Тынад синъёсад мон учки, дуное,

Отысь мон адӟи юг пиштӥсь шундыме.

Оло, синъёсы, бӧрдыса мальдӥзы,

Оло вужерез соос шунды кожазы.

   Адӟӥ мон, адӟи мон яркыт  шундыме,

  Номырин уд пӧя мӧзмем сюлэмме.

Шедьтӥ мон, шедьтӥ мон ыштэм шудбурме,

Каньыл мылкыдэн тырмытӥ лулпушме.

 

Тынад киосыд нош мынам киосам,

Тынад синъёсыд нош мынам синъёсам.

Ӝутском выллане ми чагыр инбаме,

Отын  шундымы ни кисьтэ югытсэ!

  Тынад сюлэмыд нош мынам сюлэмам,

  Со кык сюлэмъёс Инмарлэн сюлэмаз.

  Ӧвӧл ни мӧзмон но ӧвӧл ни  бӧрдон,

  Сюлмын Инмарен герӟаськем Яратон!

 

Автор стихов: Сашина Маина

 
Elupuu Elupuu in english Erzja page Khanty Komi Mari Udmurtia Veps