Главная
Наш край
Культура
Общество
Истории жизни
Музыка
Молодежь
Новости
Ссылки
Эрзя - Мокша
Коми
Марийцы
Удмурты
Культура
Сказки
Поэзия
Зеч Ивор
Истории жизни
Малпанъёс
Вепсы
English
 

Азьтэм ныл

     Одӥг бай муртлэн куинь нылыз вылэм: кыкез ужаны яратӥсь, куиньметӥез азьтэм. Кык бадӟимъёсыз умоесь картъёслы бызиллям. Куньметӥзэ нокин но, пе, уг басьты.

Со гуртын ик улэм туж начар мурт. Коркаез но туж алам вылэм, валэз но, скалэз но вылымтэ. Со начар мурт мынэм бай мурт доры азьтэм нылэз юаны. Бай мурт солы шуэм: «Ма ужалод тон соин? Со ведь туж азьтэм, номыр но уг ужа, тон соин бӧрдод». Начар мурт бай муртлы шуэ, пе: «Мон сое ужаны дышето». Бай мурт шуэм: «Озьы ке, дышеты, дышеты ужаны, мон тонэ узырмыто».

     Бай мурт нылызлы корка пуктэм но пирдан сётэм: вал, скал, ыж, кечъёс, парсъёс, дӥськут. Начар мурт бай муртлэсь со нылзэ кышно басьтэм.

     Начар муртлэн анаез, ӵукна ик султыса, чай пуктэ, пизэ, кензэ чай юнысайкатэ, пе. Пиез султыса чай юэ но ужаны кошке, кензэ йырзэ но уг ӝуты, изем амал кылле. Пиез анаезлы вераса кельтэ: «Тон, анай, та кендэ эн сюды, мед изёз нунал лумбыт». Кенэз лымшор азьын султэ но сиён куре, пе. Анаез кенэзлы вера ини: «Бен туннэ маке ужад-а, ӧд на-а, кенэ? Ми ужамтэ муртэ ум сюдӥське. Мын, маке ужа али, собере сиён сёто».

     Кенэзлэн ужамез уг поты, кыктой, куиньмой пукем, кӧтыз туж сюмам ни. Атаез доры бертэм но верам: «Монэ картэ уг сюды, ужаны косэ, куиньмой номыр ӧй сиы на». Атаез нылызлы шуэм: «Мон но тонэ, нылы, уг ни сюды, тыныд туннэ нчнь ӧй дася». Паймем азьтэм нылыз, берен картэ доры кошкем. Картэз доры бертэм но шуэм: «Вай мыным кыӵеке уж, мынам туж кӧты сюма». Со вера: «Ойдо бусые етӥн ишкыны».

     Мыныллям етӥн ишкыны. Кышноез ӧжыт етӥн ишкем но изьыны выдэм. Етӥн ана вылазы бадяр будэ вылэм, бадяр выжыын кузьыли муӵ вылэм. Картэ кышнозэ кузьыли муӵ вылэ пуктэм но бадяр борды думылэм. Кузьылиос туж зол куртчылыны кутскемзы бере, картэзлы, со шуэм ини: «Буркарик, лэзь вал, табере уг ни азьтэмъяськы, ма гинэ косӥд – вань ужало».

     Картэ кышноэз лэзем но ӝожонэн нянь сётэм. Собере кышноеныз ӵошен нунал лумбыт етӥн ишкиллям. Со дырысен начар муртлэн кышноез туж ужась луэм. Кышноез куке-соку  азьтэмъяськыны кутске ке, картэ солы шуэ: «Эй, кышно, етӥн вылысь бадярэз тодад вай». Кышноез, пе, соку ик бызьыса уж дурэ кошке.

     Одӥг пол атаез нылыз доры куное лыктэм. Кема пукем атаес ӟус вылазы. Нылыз сое уг но сюды, уг но секта. Атаез шуэ: «Ныл, коть чай пукты вал, куное лыктэме понна». Нылыз шуэм: «Педло потыса, маке ужа али, ми ужамтэ муртэ ум сюдӥське».

     Тӥни озьы одӥг начар мурт азьтэм нылэз ужаны дышетэм.

 

 

Ыргон коньдон

     Улэм-вылэм одӥг пиосмурт. Пичиосен со анай-атайтэк кылем, сирота будэм. Трос шаеръёстӥ ветлэм со, трос шуг-секытъёсты адӟоно луэм. Берытскем со вордыськем гуртаз. Татын умой нылмуртэз пумитам. Кузпалъяськиллям соос. Корка пуктӥллям. Бускельёссы но иськавын-бӧлякъёссы соослы юрттӥськиллям: кин кунянэз кузьмам, кин – ыжпизэ, кеч, ӵӧж-ӟазег но ваиллям.

     Вордӥськем таослэн пизы. Кытчы карыны но уг валало ни, пе, пиналзэс: вешаса гинэ возё. Чебер, таза будэм пизы. Анай-атаез сое эркияса гинэ возиллям, номыр ужаны но косӥллямтэ. Быдэс нунал ульчаны шудыса ветлоз вылэм. Тужгес нояратоз вылэм со, шур дуре мыныса, «ву табанен» шудыны. Кисы тросаз кӧльы дасяса возем. Нош одӥг пол со атаезлэсь шыкысэ ватэм коньдонзэ курэм. Аиз азвесь коньдонзэ лыдӟем но юам, кӧня-о, пе, кулэ. «Ваньзэ вай», - курэм пиез. Аиз паймем но номыр но верамтэ. Оло, пе, гуртэ вузчиос вуиллям но пиезлэн маке басьтэмез потэ. Пиез нош «шудыны мынӥсько» шуыса верам. «Шудоз но берен ваёз», малпам аиз.

     Васькем та пи ву дуре, кутскем шудыны. Кыӵе гинэ, пе, азвесь коньдонэз ву вылтӥ тэтчаса кошке! Ӝыт буш киын дораз бертэм. Паймем аиз. Туж йырыз кур луэм, но пиезлы пал кыл но верамтэ. Нош кӧня ке нунал ортчыса, пиез узыр адями доры ужаны нуэм. Тон, пе, табере бадӟым ини, сиёно няньдэ ужаса поты. Нунал лумбыт ӵоже пуксьылыны но, пе, дыр ӧй вал кутсаськон дуразы. Со пи культо но пыртылэм, курозэ но мужсам, ю тысьсэ одӥг интые кисьтам. Тышкам кадь жадьыса но кӧтыз сюмаса бертэм со дораз. Ымныраз, пе, синъёсыз но пиньёсыз гинэ чиляло на: сокем тузонӟем.

     «Пие, - шуэм аиз, ӝӧк сьӧры пуксемлэсь азьло пыласькыны кулэ вылэм. Ойдо ӵошен ик шур дуре васькалом». Ву дуре вуэм беразы, аиз юа ини,пе, пиезлэсь: «Я, пие, возьматы али коньдондэ, трос-а ужад?» кисы пыдэсьтыз ик поттэм пиез ӝик-ӝик утялтэм бинетсэ. Сое пертчылэм но сыномем вить копейка коньдонзэ аизлы сётэм. Аиз коньдонзэ басьтэм но вуэ куштон вылысь шоналскем. Пиез ки бордаз ӝабырскыса вуэм но черетскем: «Маар дауртӥськод тон, атай?! Та коньдонэз мон нунал лумбыт ӵоже ужам понна басьтӥ. Нош тон сое вуэ куштыны малпаськод!»

 

 

Зарни крезь: Ӟег нянь - Ижевск: Удмуртия, 1990г. - 74,110с.

 
Elupuu Elupuu in english Erzja page Khanty Komi Mari Udmurtia Veps